Pireezidaantiin Naannoo Kibba Lixaa Somaaliyaa Abdiyaziz Hasan Mohammad wal-dhabdee Siyaasaa hammmaateen aangoo gadhiisan
Published March 19, 2026, 3:57 p.m. by FNN Staff
ODUU FNN
Pireezidaantiin Naannoo Kibba Lixaa Somaaliyaa Abdiyaziiz Hasan Mohaammad Laftagareen, Paartii Haqaa fi Tokkummaa (JSP) kan Pireezidaantii biyyattii Hasan Sheek Mohammuudiin hoogganamu irraa aangoo gadhiisuu isaanii beeksisan.
Abdiyaziz Hasan Mohammad, kan dura itti aanaa dura taa’aa paartichaa ta’uun tajaajilaa turan, Bitootessa 18, 2026 irraa eegalee aangoo isaanii gadhiisuu isaanii ibsa miidiyaa biyyittii Hiiraani'f kennaniin mirkaneessaniiru.
Ibsa isaanii keessatti, “Gocha heera mootummaa faallessu fi tokkummaa biyyaa laaffisu deggaruu hin danda’u,” jechuun ibsanii, tokkummaa, dimokiraasii fi olaantummaa seeraa Somaaliyaaf kutannoon isaanii akka itti fufu hubachiisaniiru.
Pireezidaantichi, bu’uurri heera mootummaa seera qabeessa Somaaliyaa heera bara 2012 qofa ta’uu himachuun, fooyya’iinsi hojimaata seeraa sirna heeraan alaa gaggeeffame kamiyyuu fudhatama akka hin qabne ibsaniiru. Akkasumas, mootummaan federaalaa tarkaanfiiwwan tokkummaa biyyaalessaa balaadhaaf saaxilan fi naannicha keessatti tasgabbii dhabsiisan hordofaa jira jechuun himataniiru.
Himata isaanii keessaa, mootummaan giddugaleessaa milishoota mootummaa ala ta’an naannichatti sochoosuun nageenya irratti dhiibbaa uumaa jira jedhan.
Aangoo gadhiisuun isaanii kun kan dhufe naannoon Kibba Lixaa Somaaliyaa hariiroo siyaasaa fi tumsa Moqaadishoo waliin qabu addaan kutuu isaa erga beeksisee guyyaa tokko booda. Bulchiinsi naannichaa gama isaatiin, qondaaltonni federaalaa dhimma siyaasaa, nageenyaa fi bulchiinsa isaa keessa seenuu, akkasumas bobbaa waraanaa fi deeggarsa gareewwan hidhatan mootummaa naannichaan beekamtii hin qabneef kennuu isaanii irra deddeebiin himateera.
Similar posts:
Yuunaayitid Isteetis hariiroo dippilomaasii Eertiraa waliin qabdu haaromfachuuf xiinxalaa jirti jedhame.
Manni Murtii dhaabbata Tiyaansi Itoophiyaa qarshii miiliyoona 20, gaggeessitoota isaa lama immoo bakka isaan hin jirretti hidhaa waggaa 17’ fi adabbii qarshii miiliyoona 10 irratti dabarse
Amineestii Internaashinaal galmee mirga namoomaa Itiyoophiyaa bara 2025 keessaa ilaalchisee, yakka raawwatameef himatamuu dhabuu, buqqaatiifi sochiin mirga hawaasaa dhiphachuu yaaddoo qabu ibse
Pirezidaanti Tiraampi Doonii Iiraan to’annoo jala oolchuu isaanii beeksisuu hordofee gatiin boba’aa daballii agarsiise